Skip to content

გაიქეცით ქალებო, გაიქეცით!

October 19, 2014

ჩაი დავისხი, სიგარეტი მოვიმარაგე, პლედი შემოვიხვიე და მონიტორს მივაჩერდი. მაქსიმალურად ვცდილობ კომფორტი შევიქმნა, ჩემს პატარა ბინაში მაინც შევქმნა მშვიდი და სასიამოვნო სამყარო, თუმცა არ გამომდის. არასდროს ვყოფილვარ ის ადამიანი, რომელსაც შეეძლო გარშემო არსებული პრობლემები დაეიგნორირებინა.  ორი დღეა ვცდილობ აზრებს თავი მოვუყარო, მაგრამ არაფრით გამოდის. სანამ ერთი მოვლენის გადახარშვას მოასწრებს ჩემი გონება, უარესი ხდება.

მახსენდება საკუთარი თავი წლების წინ, როცა ქალთა უფლებებზე, ოჯახურ ძალადობაზე დავიწყე ფიქრი და ირგვლივ გამუდმებულ ირონიას ვაწყდებოდი (საკუთარ ოჯახშიც კი). ახლა უკვე არ არსებობს ჩემს გარშემო საღად მოაზროვნე ადამიანი, რომელიც არ აღიარებს არსებული სიტუაციის სიმძიმეს.

სანამ გამოსავალზე საუბარს დავიწყებდე (იმის მიუხედავად რომ არ ვიცი რა არის გამოსავალი), მინდა რამდენიმე საკითხს შევეხო. დანაშაული რომ მიზეზის გარეშე არ მოხდება ეს მგონი ყველამ იცის, რაღაც მიზეზი ყოველთვის არსებობს. თუმცა რა არის ეს გამომწვევი მიზეზები? მინდა ვკითხო ქალბატონ ეკა ბესელიას. თუმცა ამ შემთხვევაში მე ამნისტიას არ შევეხები.

ეს მკვლელობები უკვე თითო მკვლელობა და ერთი გამოსაძიებელი საქმე აღარ არის, ეპიდემიაა.

როცა ხარ მშობელი,  ზრდი შვილს (განსაკუთრებით დედებს ეხებათ), ხდება შენი შვილი სრულწლოვანი და საკითხს უდგება ასე – ”სხვისი ნახმარი ქალი რა ჯანდაბად მინდა შვილების დედად”, რას აკეთებ? ჩემი აზრით შვილს ადამიანურ ღირებულებებზე უნდა ესაუბრო. რა ტერმინია ”ნახმარი”? რომელასც ჩვენს საზოგადოებაში ძალიან ხშირად მოვისმენთ. ქალი ცხვირსახოცია, თეფშია, იატაკის ტილოა? ან საერთოდ როგორ ან რატომ გვიკვირს მკვლელობები, ძალადობა, როცა 20-21 წლის ბიჭებს თავისი შვილების დედის ფორმულები გამოყავთ. ამბობენ რომ ის არ უნდა იყოს ”ნახმარი” და მაშინ მას ეძლევა შანსი ამ ”ჭაბუკისგან” შვილების გაჩენის. რას აკეთებს ამ დროს ქართველი მშობელი? არ ვიცი. მაგრამ წარმომიდგენია რომ აქეზებს.

ძალიან ღრმად არის გამჯდარი ტერმინები, რომლებიც ქალებს არა თუ ამცირებს, ადამიანადაც არ აგდებს. ჩვენ ვიცინით ამაზე, ზოგჯერ ალბათ ”არა ნახმარი” გოგოებიც უბამენ მხარს. დიახ, მგონია და თითქმის დარწმუნებული ვარ რომ მშობლები უწყობენ ხელს კაცის თვალში ქალის დასაკლავ ცხოველად გამოჩენას. ის რომ ადამიანებს ასე ყოფ ხომ ძალიან ცუდია და კიდევ უფრო ცუდია, როცა ”შვილების დედას” ქმნი სახედ, რომელიც მომავალში უნდა გემსახუროს შენ, შვილებს, ოჯახს. აღარ არის ეგრე ძალიან დიდი ხანიაო ბევრჯერ უთქვამთ ჩემთვის, მაგრამ ხშირად შევხვედრივარ ახალგაზრდა ადამიანებს, რომელბიც ზუსტად ასე უდგებიან საკითხს – ქალი არის სხვა თემა, ცოლი სხვა.

პოლიციის, საზოგადოების, ხელისუფლების სიცივე. როცა ადამიანი დაუცველია, როცა არ არსებობს შემაკავებელი მექანიზმი აუცილებლად იქნება ძალადობა. ეს ყველაფერი არის დაუცველობის დიდი ჯაჭვი. ადამიანს უნდა იცავდეს ხელისუფლება, პოლიცია და საზოგადოება. ქალს არ უნდა სჭირდებოდეს ძლიერი ძმა, მამა ან ნათესავი დასაცავად.არ უნდა გამოიყოფოდნენ სუსტი და ძლიერი ქალები, ჩვენ ყველანი უნდა ვიყოთ თანაბრად დაცულები. არ ვიცი რომელი ერთი ამბავი მოვიყვანო მაგალითად, როცა პოლიცია ვერაფერს ან არაფერს არ აკეთებს ძალადობის მსხვერპლის დასაცავად, და საზოგადოება რომელიც გაკვირვებული აცხადებს რა უნდა ექნათ? ხომ არ დაიჭერდნენ მხოლოდ იმიტომ რომ ქალმა თქვა ჩემზე ძალადობენო?

ადრე იყო პრობლემა ქალები ხმას არ იღებენ და ჩვენ როგორ დავეხმაროთო. ახლა ზუსტად ვიცით რომ ქალებმა ხმა ამოიღეს, ითხოვეს დახმარება და ისინი მაინც მოკლეს. ზოგჯერ მგონია რომ არაფერს აზრი არ აქვს, ამ თემებზე საუბარი სრული აფსურდია იმ საზოგადოებაში სადაც ადამიანის სიცოცხლეს ნამდვილად ჩალის ფასი აქვს, თუმცა ჩალა გაცილებით ძვირად ფასობს ამ ქვეყანაში. იყო დრო როცა მეგონა რომ დაზარალებულ ქალებს ხმა უნდა ამოეღოთ, ახლა აღარ ვიცი რა ვუთხრა ამ ქალებს. ან  მე თუ მსგავსი რამ შემემთხვევა რას ვიზამ? თუ ვიქნები მსხვერპლი, ვიქნები სუსტი, რას იტყვიან გარშემომყოფები? დაიწყებენ იმის ძიებას მანამდე ვისთან მქონია ურთიერთობა, იქნებ ვაწყენინე ვიღაცას, იქნებ არასწორი გადაწყვეტილება მივიღე და ამ დროს თუ მომკლეს? ჩემს თავზე იმიტომ გადმომაქვს, მინდა ამ პოსტის მკითხველმა გაააცნობიეროს რომ დაცული არავინაა.

თითოეულ მოკლულ ქალზე ისტორიის გაგებისას გული საშინლად მეკუმშება, მაქვს შეგრძნება რომ ამ ყველაფერს ერთი ადამიანი აკეთებს და მალე ჩემს ირგვლივაც დაერევა ჩემთვის ძვირფას ქალებს. დიახ, ზუსტად ერთი ადამიანის სახე აქვს იმ საზოგადოებას, რომელიც ვერაფერს ან არაფერს აკეთებს.

რა არის გამოსავალი? რა გითხრათ? მოდით დავირაზმოთ ქალებო, ერთად დავდგეთ და ბევრნი რომ ვიქნებით ვერაფერს დაგვაკლებენ – მეთქი? ასე სუსტად არასდროს მიგრძვნია თავი. სანამ მე ამ პოსტს ვწერ ვიღაც ქალს შეიძლება ატერორებენ, სისხლს უშრობენ, აშანტაჟებენ და მალე შეიძლება მოკლან კიდეც. ძალიან მინდა რომ ხმა ამოიღოს ეკლესიამ, როგორმე ერთ ძალადობის საწინააღმდეგო განცხადებას თუ ეპისტოლეს მოაბან თავი. გამოვიდნენ ხელისუფლების წარმომადგენლები, თუ გამოსავალს ვერ ხედავენ მოწოდებები მაინც გააკეთონ, როცა ხელისუფლების ხელში ჩაგდება უნდოდათ ხომ არ ჩუმდებოდნენ? ახლა ნარკოტიკებზე, რუსეთზე და ქურდობებზე გაცილებით დიდი პრობლემა გვაქვს ქვეყანაში. ყველა ადამიანი ვისაც რაიმე  საშუალება აქვს გამოხატოს აზრი, ლაპარაკი, მოწოდება ყველაზე მინიმუმია რაც შეგიძლიათ გააკეთოთ. ვერავინ დამაჯერებს რომ მე აღვიქვამ მძაფრად ამ სიტუაციას. თუ ადამიანის სიცოცხლე არ არის ყველაზე მთავარი ღირებულება, მიმიფურთხებია თქვენი იდეებისა და ლაპარაკისათვის.

გამოხტება ვიღაც და იტყვის რა ტვინი წაიღეთ ამ ქალებითო, და ეგ ადამიანები ყველანი შეურაცხადები ხართ. ხომ გამოხვედით მთელი ერი არიქა შუქი არ გვაქვს და არიქა შევარდნაძემ ქვეყანა დაგვინგრიაო? ხომ გამოვედით მთელი ერი არიქა კაცებს გვიუპატიურებენო? დღეში ორი ყოფილი ცოლი კვდება და ეს უფრო მნიშვნელოვანი არაა? თუ მიზეზებს არკვევთ? პატიმრებს რომლებსაც ცოცხებით უპირისპირდებოდნენ შეიძლება მძიმე დანაშაული ჰქონდათ ჩადენილი, მაგრამ ჩვენ ავიმაღლეთ ხმა ძალადობის, ადამიანობის შელახვის წინააღმდეგ.

კიდევ რამდენი ქალი უნდა მოკლან? არავინ მითხრათ რომ საზოგადოება არაფერ შუაშია და არაფრის გაკეთება არ შეუძლია. როცა საზოგადოებას სჭირდება ძალიან კარგად ხმაურობს და რატომ ვითხოვთ ხელისუფლებისგან ”იდეალურობას”, თუ თავად ვართ დაკავებული შერჩევითი სამართალით.

მაპატიეთ სასოწარკვეთილი ტონისთვის,

მაპატიეთ რომ კონკრეტული გამოსავალი არ ვიცი.

გაიქეცით ქალებო, რაც შეგიძლიათ შორს გაიქეცით, რადგან ჩვენ ვერაფერს ვაკეთებთ თქვენს დასაცავად!

Advertisements
No comments yet

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: